ಕವನ

 .             ಕವನ ಕನವರಿಕೆ.

ನುಡಿಯಲ್ಲವಿದು ಗೆಳೆಯ  ಎದೆಯ ಚಡಪಡಿಕೆ

ಸವೆದ   ಶಬ್ದಗಳಲ್ಲಿ ಕವನ ಕನವರಿಕೆ.

ಕಳೆದ ಕಾಲವದೆಷ್ಟೋ..ನಿಟ್ಟುಸಿರ ಘಳಿಗೆಗಳು..

ಮರೆತಷ್ಟು ಮೊರೆಯುವುದು ನೆನಪ ಮೆರವಣಿಗೆ..

ಬಿತ್ತಿದ್ದು ಬೆಳೆದಿದ್ದು ಎದೆಯ ಭಿತ್ತಿಯ ತುಂಬಾ

ಹೂವಾಗಿ ಘಮಘಮಿಸೋ  ನಿನ್ನ ಮುಖದೊನಪು..

ಸುಳಿಗಾಳಿ, ಎಳೆಮಿಂಚು, ಹನಿಮಳೆಯ ದಿನಗಳಲೂ

ಹಳೆಗಾಯ ಹೊಸತಾಗಿ, ಎದೆ ರಕ್ತ ಕೆಂಪು...

ಹನಿಯೊಂದು ತೆಳುವಾಗಿ ಕಣ್ಣೊಳಗೆ ಕದಲುತ್ತಾ..

ಕಣ್ಣ  ಕೆರೆಯಲೆಗಳಲಿ , ನಿನ್ನದೇ ಬಿಂಬ..

ನೀನಲ್ಲಿ ..ನಾನಿಲ್ಲಿ, ಎಲ್ಲಿದ್ದರೆನಂತೆ..

ಭಾವದಲೆಗಳ   ಮೇಲೆ ಅನುದಿನದ ಪಯಣ..

ತೇಲಿಬಿಡು ಹೊಸಹೊಸತು ಕನಸುಗಳ ಹೆಣೆ ಹೆಣೆದು
ಇರುಳ ನಕ್ಷತ್ರಗಳ ಬೆಳಕಿನಲೆಗಳಲಿ..