ಭಾನುವಾರ, ಡಿಸೆಂಬರ್ 21, 2014

ಸಿಗಲಾರದ ಚಂದಿರ..




ಬಾವಿಯಾಳದಿಂದ ನೀನು
ನೀರಿನೊಡನೇ ಎದ್ದುಬಂದೆ...
ಇನ್ನೇನು..
ಕೈಗೆ ಸಿಕ್ಕಿಬಿಟ್ಟೆ ಎನ್ನುವಾಗ
ದೂರದ ಆಗಸದಲ್ಲಿ ಹೋಗಿ ನಗುವುದೆ??
ಓಡಿದರೆ ಜೊತೆಗೆ ಓಡುವ ಕಳ್ಳ
ನಿಂತರೆ ಅಲ್ಲಿಯೆ ನಿಲ್ಲುವೆಯಲ್ಲ..
ಕೂಗಿದರೆ ಮಾತ್ರ..
ಮಾತು ಬಾರದವನಂತೆ
ಬೆನ್ನು ತಿರುಗಿಸಿ ಹೋಗುವ ಮಳ್ಳ...
ಎಲ್ಲರಿಗೂ ಸಿಗದ ಚಂದಿರನು ನೀನು..
ಸಿಗುವೆ ಕೆಲವರಿಗೆ,, ಬೆಳ್ದಿಂಗಳ ಪ್ರೀತಿಯಾಗಿ,
ಬೆಳ್ಳಿ ನಗೆಯಾಗಿ-ಉಲ್ಲಾಸದ ಕ್ಷಣವಾಗಿ..
ಸಿಕ್ಕರೂ ಅಪೂರ್ಣ..
ಚುಕ್ಕಿ ಚೂರಂತಾಗಿ..
ರಂಗೋಲಿ ಎಳೆಯಾಗಿ
ಬೆಳೆದು ಹುಣ್ಣಿಮೆಯಾಗಿ...
ಪೂರ್ಣವಾದೆ ಅನ್ನುವಾಗ..
ಅಮವಾಸ್ಯೆಯಲಿ ಕರಗಿ..
ಆದರೂ..
ಆಕಾಶ ನಿನ್ನದೊಂದೇ ಅಲ್ಲ..
ರಾಶಿ ರಾಶಿ ಚುಕ್ಕಿ ಗೊಂಚಲಿದೆಯಲ್ಲ,,
ಇರುವ ನೀನು ಎಲ್ಲರಿಗೂ ಸಿಗಲೇಬೇಕೇನು??
ಬದುಕಬಹುದಲ್ಲ,,,ಸಿಗದಿದ್ದರೂನು....

ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ